Дзень беларускай навукі-2024
Штогод у апошнюю нядзелю студзеня, пачынаючы з 1993 года, у Рэспубліцы Беларусь адзначаецца Дзень беларускай навукі.
Каардынатарам падрыхтоўкі і правядзення ў 2024 годзе мерапрыемстваў, прысвечаных Дню беларускай навукі, урадам вызначаны Дзяржаўны камітэт па навуцы і тэхналогіях. Створаны арганізацыйны камітэт з ліку прадстаўнікоў органаў дзяржкіравання, НАН Беларусі і іншых арганізацый. Аргкамітэтам зацверджаны лагатып, а таксама слоган Дня беларускай навукі – «Навука, інавацыі, якасць». 26 студзеня 2024 года ў Нацыянальнай бібліятэцы Беларусі прайшлі мерапрыемствы, прымеркаваныя да Дня беларускай навукі.
У галерэі Нацыянальнай бібліятэкі Беларусі працавала выстава дасягненняў беларускай навукі, на якой былі прадстаўлены перадавыя распрацоўкі беларускіх вучоных з Нацыянальнай акадэміі навук Беларусі, Міністэрства адукацыі, Міністэрства аховы здароўя, Міністэрства сельскай гаспадаркі і харчавання, Міністэрства прамысловасці, Міністэрства прыродных рэсурсаў і аховы навакольнага асяроддзя, Дзяржаўнага ваенна-прамысловага камітэта, Міністэрства абароны, а таксама рэзідэнтаў тэхнапаркаў. У выглядзе натурных узораў, макетаў, прэзентацый, відэаролікаў, друкаваных выданняў была прадстаўлена 291 распрацоўка ад 70 устаноў і арганізацый.
Таксама ў Нацыянальнай бібліятэцы прайшоў рэспубліканскі сход навуковай грамадскасці, падчас якога былі ўручаны ўзнагароды прадстаўнікам акадэмічнай, вузаўскай і галіновай навукі, якія ўнеслі найбольш значны ўклад у развіццё навуковай, навукова-тэхнічнай і інавацыйнай дзейнасці. Для ўдзельнікаў святочнай падзеі была арганізавана канцэртная праграма з удзелам артыстаў і калектываў Рэспублікі Беларусь, пераможцаў, прызёраў міжнародных і рэспубліканскіх конкурсаў.
Сярод удзельнікаў мерапрыемства – кіраўніцтва Нацыянальнай акадэміі навук Беларусі, Дзяржаўнага камітэта па навуцы і тэхналогіях, Міністэрства адукацыі, Міністэрства аховы здароўя, Міністэрства культуры, Міністэрства прамысловасці, а таксама прадстаўнікі Міністэрства сельскай гаспадаркі і харчавання.
У рамках сектара інавацый біялагічнай, медыцынскай, фармацэўтычнай, хімічнай тэхналогій і вытворчасці былі прадстаўлены інавацыйныя распрацоўкі вучоных Віцебскай ордэна «Знак Пашаны» дзяржаўнай акадэміі ветэрынарнай медыцыны.
